Nakon što su klanjali podne namaz, imami iz Plava i Gusinja zajedno su sa okupljenim građanima prošetali glavnom plavskom ulicom, a zatim se i molili za žrtve u Gazi, prenosi Anadolija.

Okupljeni građani nosili su transparente na kojima je pisalo "Free Palestina", "I djeca Gaze su djeca", kao i mnoge druge.

Imam Šabovića džamije u Plavu Muhamed Cecunjanin je pozvao zvanične organe Crne Gore da ne ćute, već da osude zločine koje Izrael sprovodi nad civilima Gaze.

"Zašto svijet šuti? Crna Gora se tradicionalno pozivala na čojstvo i junaštvo. Evo sada prilike da Crna Gora pokaže i svoje čojstvo i svoje junaštvo. Da osudi zločine, da osudi ubijanje palestinskih civila i palestinske djece. Ti životi imaju istu vrijednost kao i životi naše djece. Neka mala Crna Gora bude velika, neka osudi zločine Jevreja i Izraela. Neka osudi ubijanje djece, staraca, rušenje džamija, rušenje škola i bolnica. Neka Crna Gora pokaže moralnu veličinu. A ako izabere drugi put, put poginjanja glave, kukavičluka i put ćutnje, na taj način podržava ono što Izrael radi narodu Palestine", poručio je Cecunjanin.

Zašto svijet ćuti?

Okupljeni su zatim krenuli u protestnu šetnju, a kasnije su u nebo puštena četiri goluba, kao poziv da stanovnici Palestine konačno osjete slobodu.

Skup je organizovala omladina Plava, a podršku skupu pružili su Odbori Islamskih zajednica Gusinje i Plav.

Podsjećamo, broj poginulih u izraelskim udarima na pojas Gaze premašio je hiljadu. Prema procjenama nevladinih organizacija, 80 posto žrtava čine civili, uključujući veliki broj žena i djece. Takođe, na prostoru pojasa Gaze srušeno je više od 10 bolnica  i 45 džamija.

(RTCG)